Vaşinqton "Nvidia" şirkətinin bir neçə milyard dollarlıq yüksək texnoloji mikrosxemlərinin Birləşmiş Ərəb Əmirliklərinə (BƏƏ) ixracına razılıq verib.

Gundemxeber.az xəbər verir ki, bu barədə məlumatı "Bloomberg" agentliyi yayıb.

Adının açıqlanmasını istəməyən amerikalı məmur agentliyə bildirib ki, ABŞ Ticarət Nazirliyi strukturuna daxil olan Sənaye və Təhlükəsizlik Bürosu may ayında Əbu-Dabidə imzalanmış razılaşmaya müvafiq olaraq "Nvidia"ya ixrac lisenziyası verib. Lakin bu sövdələşmənin icrasına yalnız BƏƏ Birləşmiş Ştatlara dəqiq investisiya planı təqdim etdikdən sonra start verilib. İnvestisiyaların məbləği və mikrosxem təchizatının dəqiq həcmi hələlik açıqlanmır.

ABŞ Prezidenti Donald Tramp may ayında Şərq turnesi zamanı BƏƏ-yə mikrosxem ixracını dəstəkləyib. Tərəflərin sövdələşmənin detallarını qısa müddətdə razılaşdıra biləcəklərinə ümid etmələrinə, "Nvidia"nın təchizatı başlamağa hazır olmasına baxmayaraq, tam razılıq uzun müddət əldə edilməyib.

Amerika KİV-lərinin yazdığına görə, Vaşinqton bu çiplərin Yaxın Şərq ölkələrindən Çinə göndəriləcəyindən ehtiyat edib.

Gundemxeber.az