Tanınmış iqtisadçı, bank sektoru üzrə hüquqşünas Əkrəm Həsənov Mərkəzi Bankın sədri Taleh Kazımovla görüşdə “Turanbank”da əmanətçiyə qarşı baş vermiş qanun pozuntusu barədə onu məlumatlandırıb.

Xatırladaq ki, baş bankir indiyədək bir neçə dəfə müstəqil ekspertlərlə görüşərək bank və maliyyə sektorundakı mövcud durumu müzakirə edib, onların suallarını cavablandırıb, təkliflərini dinləyib. Onun bu addımı mütəxəssislər tərəfindən rəğbətlə qarşılanır.

Əkrəm Həsənov bildirib ki, Taleh Kazımova ünvanladığı sual əmanətlər haqda olub: “Məlumdur ki, banklar uzunmüddətli əmanətlərdə maraqlıdır. Lakin hazırda bir bank — “Turanbank” — uzunmüddətli əmanətlər üçün təhlükə yaradıb. Deməli, müştəri bu banka 2009-cu ildə 100 min dollar əmanət yerləşdirib, 3 il sonra isə vəfat edib. Övladı yalnız indi sənədlərin içində əmanət müqaviləsini və kassa çekini (həmçinin bir torpaq sahəsinə mülkiyyət sənədini) tapıb və notariusa müraciət edib. Lakin “Turanbank” bildirir ki, guya əmanətçi hələ 2010-cu ildə əmanətini çıxarıb. Bank bunu nə ilə sübut edir? Heç nə ilə! Deyir ki, 2016-cı ildə isə bununla bağlı bütün sənədləri məhv edib, çünki Mərkəzi Bankın qaydalarına əsasən sənədləri azı 5 il saxlamalıdır, 5 il bitib, o da sənədləri məhv edib.

Başqa sözlə, “Turanbank” demək istəyir ki, banklarımızda 5 ildən çox əmanət saxlamaq çox təhlükəlidir. Çünki 5 ildən sonra gəlib əmanəti istəsəniz, bank deyə bilər ki, elə sabahısı gün gəlib çıxarmısınız, 5 il ötüb, o da sənədləri məhv edib. Bank sistemi üçün bundan böyük təhlükə ola bilməz, əlbəttə: əmanətçilər üçün qeyri-müəyyənlik yaratmaq! Niyəsə İsveçrə banklarına bir əsr sonra da müraciət edib pulunuzu istəyə bilərsiniz, amma bizim bir bankımız bütün bank sisteminin nüfuzuna xələl vuraraq belə absurd mövqe nümayiş etdirir”.

Hüquqşünas vurğulayıb ki, problem ondadır ki, bu mövqeyi sıravi bank işçisi deyil, bankın İdarə Heyətinin sədri yazılı şəkildə bildirib. Əkrəm Həsənov davam edib: “Dəhşətdir! İndiyədək bu bank bilmir ki, Mərkəzi Bankın tələbləri sırf banklara aiddir, müştərilərə şamil olunmur. Mərkəzi Bank deyəndə ki, sənədi azı 5 il saxla, bu o deməkdir ki, yoxlamaya gələndə 5 illik sənədləri istəyə bilər. Amma təbii ki, bankın müştəri qarşısında öhdəliyinin icrasını təsdiq edən sənədlərin saxlanılması ilk növbədə bankın özünə lazımdır. Çünki əmanəti qaytarmasına dair sübutetmə yükü onun üzərindədir”.

İqtisadçı deyib ki, baş bankir məsələnin araşdırılacağını bildirərək təsdiqləyib ki, Mərkəzi Bankın tələbləri sırf banklara aiddir, müştərilərə aid deyil.

“Ümid edirəm ki, digər banklarda belə hallar yoxdur və yalnız “Turanbank”da 5 ildən çox pul saxlamaq təhlükəlidir. Lakin buna necə əmin olaq? Bir bank bütün bank sisteminin üzünü qara edə bilər...”, - Ə.Həsənov qeyd edib.

Gundemxeber.com