Azərbaycan dövlətinin təhsil müəssisələrində vahid məktəbli formasının tətbiqi ilə bağlı qəbul etdiyi qərar, ölkədə kənar dini və siyasi təsirlərin qarşısını almaq, şagirdlər arasında bərabərliyi təmin etmək məqsədi daşıyır. Məlum olduğu kimi, Baş nazir tərəfindən təsdiqlənən vahid forma qərarı məktəblərdə nizam-intizamın möhkəmləndirilməsinə xidmət edir.

Lakin Azərbaycanda sabitliyi pozmaq və dini amillərdən öz çirkin məqsədləri üçün istifadə etmək istəyən İran rejiminin ölkəmizdəki niyyəti hər zaman bəlli olub. Baş nazirin qərarından sonra Azərbaycanın bir neçə məktəbinin qarşısında "Hicaba azadlıq" adı altında təxribat xarakterli aksiyalar təşkil edildi. Ölkə daxilində bu cəhdlərin heç bir nəticə vermədiyini və cəmiyyət tərəfindən dəstəklənmədiyini görən iranyönlü qüvvələr indi də fəaliyyətlərini xaricdə davam etdirməyə çalışırlar.

Berlindəki yürüşün arxasında İran dayanır

Analoji təxribatların davamı olaraq, 18 oktyabr 2026-cı il tarixində Almaniyanın Berlin şəhərində Azərbaycana qarşı genişmiqyaslı yürüş-aksiya keçirilib. Aksiya cəhdinin əsas təşkilatçısının və maliyyələşdiricisinin məhz İran dövləti və onun nəzarətində olan iranyönlü qüvvələr olduğu aydın görünür. Tehran rejimi məktəblər və şagirdlər üzərindən təzyiq rıçaqı formalaşdıraraq, Azərbaycanı öz iradəsinə tabe etməyə və dini radikalizmi ölkəmizə ixrac etməyə cəhd göstərir.

Rejimin riyakarlığı: İrandakı mənzərə və xaricdəki aksiyalar

Bu qüvvələrin niyyətinin "dini azadlıq" olmadığını elə İranın özündə cərəyan edən hadisələr sübut edir. Əgər bu siyasətin arxasında təmiz və səmimi məqsədlər dursaydı:

İranda qadınların məcburi hicab qaydalarına qarşı kütləvi etirazları baş verməzdi;

Hicab məcburiyyətinə "yox" deyən dinc sakinlərə qarşı İran hökuməti tərəfindən qanlı divan tutulmazdı.

İran rejiminin öz ölkəsində qadın hüquqlarını kobud şəkildə tapdalayıb, xaricdə "dini azadlıq" adı altında aksiyalar təşkil etməsi növbəti siyasi riyakarlıq və Azərbaycana qarşı yönəlmiş açıq təxribatdır.

Şirin Cəfəri

Gundemxebertv.com