Bakı Elmi Tədqiqat Göz Xəstəlikləri Klinikasında qoyulan səhv diaqnozlar

Səhiyyə sistemində baş verən özbaşnalıqlar hər gün yeni çalarlar alır. Səhiyyə ocaqları xəstələrin qorxulu kabusuna çevrilib. Burada baş verən soyğunçuluq, rüşvətxorluq halları bir yana qalsın, səhv diaqnoz ucbatından məhv olanların sayı həndəsi silsilə ilə artır. Xüsusilə bəzi öz işinə məsuliyyətsiz yanaşan həkimlərin əməlləri nəticəsində vətəndaşlar incidilir, səhv diaqnozlar səbəbi ilə min bir əziyyətə düçar olurlar. Belə məsuliyyətsiz, sənətinin incəliklərini bilməyən həkimlər insanların taleyi ilə oynayır, şəxsi mənafeləri naminə başqalarının sağlamlığını təhlükə altında qoyurlar. Təəssüf ki, belə həkimlər hələ də bir çox dövlət və özəl xəstəxanalarda fəaliyyət göstərir, xəstələrin sağlamlığı bahasına maraqlarını təmin edirlər.
Redaksiyamıza müraciət edən Şamaxı rayonu Çarhan kənd sakini İbrahimova Solmaz da az qala belə bir həkim məsuliyyətsizliyinin qurbanı olacaqdı. Belə ki, gözlərindən şikayət edən İbrahimova S. 23 aprel 2014-cü ildə Bakı Elmi Tədqiqat Göz Xəstəlikləri Klinikasına müraciət etmiş və müvafiq yoxlamalardan keçmişdir. Klinikada müalicə həkimi N. Kərimovanın imzası ilə verilmiş tibbi arayışda ona OD-başlanğıc katarakta, OS-yetişməmiş katarakta diaqnozu qoyulub və təcili cərrahi əməliyyat olunması tövsiyyə olunub. Lakin, qoyulan diaqnoza inanmayan xəstə sonra Mərkəzi Neftçilər Xəstəxanasında müayinədən keçmiş və xəstəyə mokulyar yırtıq diaqnozu qoyulub. Gözləri üçün narahatlıq keçirən İbrahimova S. dəqiq müayinə üçün Akademik Zərifə Əliyeva adına Milli Oftalmologiya Mərkəzinə müraciət etmiş və Mərkəzi Neftçilər Xəstəxanasında qoyulmuş diaqnoz öz təsdiqini tapmışdır.
Bakı Elmi Tədqiqat Göz Xəstəlikləri Klinikasında xəstəyə səhv diaqnoz qoyulub və bunun üçün ondan 60 manat pul alınıb. Dəhşətli orasıdır ki, diaqnozun səhv olmasına baxmayaraq, klinikada S.İbrahimovaya təkidlə təcili əməliyyat olunması gərəkdiyi bildirilib və ondan 1200 manat pul istənilib. Əgər xəstə öz səhhəti üçün narahatlıq keçirib digər klinikalara müraciət etməsəydi, onun aqibətinin necə olacağı sual altında qalacaqdı. Yalnız pul qazanmaq məqsədi ilə bir insanın taleyini təhlükə altında qoyan belə klinikalara və həkimlərə nə ad vermək olar? Yəqin ki, məsələni araşdıracaq hüquq-mühafizə orqanları qanunamüvafiq tədbirlər görəcəkdir.
Nicat Mahmudov