Bəzən elə bilirik ki, malikanələrdə, milyonluq villalarda, sərvət və şöhrət içində yaşayan insanların dərdi-səri olmaz. Amma Kral ailəsi ilə bağlı son xəbərlər bunun tam əksini göstərir.
İngiltərə mediasının yazdığına görə, Şahzadə Harri ilə Kral III Çarlz arasında danışıqlar başlayıb. Bu, illərdir davam edən gərginliyin yumşalacağına dair ümid yaradır.

Ata və oğulun köhnə şikayətləri arxada qoyacağı düşünülür. Amma vəziyyət Şahzadə Uilyamla daha qaranlıqdır. Ən böyük səbəb isə Harrinin 2023-cü ildə dərc olunan “The Spare” kitabıdır. Orada Harri toy ərəfəsində Keytlə Meqan arasında yaşanan gərginlikdən bəhs edib, Ketrinin göz yaşı tökməsinə eyham vurub, Uilyamla özünü daim “rəqabətdə” gördüyünü yazıb. İnsayderlərə görə, bu sözlər “dərin yara” qoyub. Uilyamın həyat yoldaşı Ketrin də barışıq yolunda ən böyük maneə kimi qalır.

Buradan çıxan nəticə sadədir. Pul, var-dövlət, status insani münasibətləri xilas etmir. Malikanələrdə yaşayan kral ailəsinin də problemləri var. Həm də bəzən daha mürəkkəb. Çünki onların ailə mübahisələri sadəcə şəxsi məsələ olaraq qalmır, bütün dünyanın gözü önündə yaşanır.

Kral olmaq və ya şahzadə adını daşımaq xoşbəxtliyin zəmanəti deyil, ən bahalı sarayda belə ailədaxili etimad sarsılarsa, rahatlıq tapmaq çətindir. Pul yalnız həyat şəraitini dəyişir, amma münasibətləri düzəltmir.

Kral ailəsindəki qalmaqallar bizə göstərir ki, insani dəyərlər, anlayış və bağışlama bacarığı heç bir sərvətlə əvəz olunmur. Villalar, bahalı maşınlar və titullar ailə münasibətlərindəki çatları gizlədə bilmir. Əsl xoşbəxtlik saray divarlarında deyil, ailə içində qurulan güvəndədir

Gundemxeber.az