Bu gün səhər saatlarında Bakı-Qazax yolunun 209-cu kilometrliyində, Ucar rayonu Yeniyol kəndindən keçən hissəsində ölümlə nəticələnən dəhşətli yol qəzası baş verib.

Belə ki, “Qazel” markalı yük maşını ilə yanacaq daşıyan yük maşını toqquşub. Nəticədə yanacaqdaşıyan yük maşını aşıb və alışıb. Alov qısa zaman içərisində toqquşduğu avtomobilə də keçib.

Qəza nəticəsində “QAZel”də olan iki nəfər yanaraq ölüb. Hadisə yerinə çağırılan xilasedicilərin köməyilə yanacaqdaşıyan avtomobilin sürücüsü maşından çıxarıla bilib. Onun da ağır yaralandığı bildirilir. Bədəninin çox hissəsi yanan sürücü dərhal xəstəxanaya yerləşdirilib.

Hadisə yerinə gələn yanğınsöndürənlər yanğını söndürüblər. Hadisə yerinə hüquq-mühafizə orqanları cəlb olunub.

Faktla bağlı araşdırma aparılır.