Fövqəladə Hallar Nazirliyi “Karvan” ticarət mərkəzindəki yanğınla bağlı məlumat yayıb. Musavat.com nazirliyin saytına istinadən xəbər verir ki, Fövqəladə Hallar Nazirliyinin canlı qüvvə və texnikası hadisə yerinə cəlb olunub, aidiyyəti qurumlar məlumatlandırılıb. Ümumi sahəsi 10000 kv.m olan 4 mərtəbəli ticarət mərkəzinin 1-ci mərtəbəsinin yanar konstruksiyaları 600 kv.m sahədə və içərisində olan satış malları yanıb. Yanğının kəşfiyyatı zamanı 1967-ci il təvəllüdlü Əliyev İlqar Tərlan oğlunun meyiti aşkar olunub və yuxarı mərtəbələrdən 6 nəfər fəhlə yanğınsöndürən-xilasedicilər tərəfindən xilas olunub. Yanğından ticarət mərkəzinin qalan hissəsi mühafizə olunub. Ərazidə təhlükəsizlik tədbirləri görülüb.
***


09-10-2014; 23.56
FHN xilasediciləri yanğın nəticəsində dünyasını dəyişən şəxsin meyitini binadan çıxarıb. Təxminən 50 yaşında kişidir. İlkin məlumata görə, adı İlqardır (soyadı dəqiqləşdirilir) və Şirvan şəhər sakinidir. “Karvan” ticarət mərkəzində fəhlə işləyirmiş.

***

22.37
Fövqəladə hallar nazirinin müavini Etibar Mirzəyev hadisə yerində jurnalistlərə aşçıqlama verib. APA-nın hadisə yerindəki əməkdaşının verdiyi məlumata görə, nazir müavini bildirib ki, yanğın nəticəsində 1 nəfər tüstüdən boğularaq ölüb, 5 nəfər isə zəhərlənmə dizaqnozu ilə xəstəxanaya yerləşdirilib. E.Mirzəyev deyib ki, yanğın təxminən 350 kv.m. sahəni əhatə edib. Yanğının səbəbləri ilə bağlı araşdırma aparılır.
APA-nın məlumatına görə, FHN xilasediciləri yanğın nəticəsində dünyasını dəyişən şəxsin meyitinin çıxarılması üçün tədbirlər görürlər.
***

22.22
Sumqayıtda “Karvan” ticarət mərkəzində yanğın söndürülüb. Hadisə yerinə fövqəladə hallar nazirinin müavini Etibar Mirzəyev gəlib. Xəsarət alanlar barədə hələlik məlumat yoxdur.
Musavat.com-dan: Xatırladaq ki, ötən il oktyabrın 19-da “Karvan” ticarət mərkəzində yanğın baş vermişdi. Əraziyə cəlb olunan yanğınsöndürən briqadalar tərəfindən yanğının qarşısı təxminən 6 saat sonra alınmışdı. Fövqəladə Hallar Nazirliyinin açıqladığı məlumata görə, ticarət mərkəzinin ümümulikdə 23 min 700 kvadrat metr hissəsi yanıb.

O vaxtkı yanğın zamanı 10 nəfər bədən xəsarətləri, 22 nəfər isə tüstü zəhərlənməsi diaqnozu ilə xəstəxanaya yerləşdirilmişdi.
***
21.37
Sumqayıtda “Karvan” ticarət mərkəzində yanğın başlayıb.
APA-nın məlumatına görə, hadisə yerinə FHN Dövlət Yanğından Mühafizə Xidmətinin Sumqayıt hissəsinin 7 yanğınsöndürən maşını və canlı qüvvəsi cəlb edilib. Hazırda yanğının söndürülməsi və yayılmasının qarşısının alınması üçün tədbirlər görülür.
FHN Xüsusi Riskli Xilaetmə Xidmətinin xilaediciləri ərazidə təhlükəsizlik tədbirləri görürlər.
Əlavə məlumat veriləcək.