Fazil Mustafa: "Rüşvətin qarşısını almaq və bir nəticə ortaya qoymaq üçün ictimaiyyəti hərəkətə gətirmək lazımdır"

Azərbaycan “Rüşvətin qarşısını almaq və bir nəticə ortaya qoymaq üçün ictimaiyyəti hərəkətə gətirmək lazımdır”. ANS PRESS-in məlumatına görə, bunu millət vəkili Fazil Mustafa deyib. Onun sözlərinə görə, yuxarı səviyyədə gəlir deklorasiyası hazırlanmaldır.

“Düzdür, ölkə başçısının bu barədə qərarı var. 7 il öncə gəlir deklorasiyasının doldurulması üçün Nazirlər Kabineti forma hazırlayıb, ancaq heyf ki, onun icrası yubadılır. Azərbaycanda məmur heç nəyə görə hesabat vermir. Hesabat olmayan yerdə isə kimin nəyi qanuni, nəyi qeyri-qanuni etdiyi bilinmir. Ona görə də prezidentin niyyəti açıq bir niyyətdir, onu xalqın özü də dəstəkləyir. Deməli, buna mane olan qüvvələri prezident kənarlaşdırmalıdır ki, müəyyən bir nəticə əldə edilsin”, - deyə Fazil Mustafa deyib.

Qeyd edək ki, Bakının Sabunçu rayonunun Yeni Ramana qəsəbəsində Sağlamlıq İmkanları Məhdud Gənclərin Peşə Reabilitasiya Mərkəzinin yenidənqurmadan sonra açılış mərasimində iştirak edən prezident İlham Əliyev bütün məmurlara üz tutaraq deyib ki, Azərbaycan dövləti korrupsiyaya, rüşvətxorluğa qarşı bundan sonra da çox ciddi və güzəştsiz, amansız mübarizə aparacaq.

Milli Məclisin İntizam komissiyasının üzvü Fazil Mustafa hesab edir ki, gəlir deklorasiyası proqramı müsbət həyata keçirilsə, Azərbaycanda da digər sivil ölkələrdə olduğu kimi rəsmi şəkildə milyarderlər yarana bilər, rüşvətxorluğun, korrupsiyanın qarşısı alınar, indisə kimin nə qədər pulu olduğunu müəyyənləşdirmək qeyri mümkündür, çünki heç bir məmur gəlir deklorasiyası doldurmur.