Darmadağın olmuş müstəqil mətbuat, tamamilə monopoliyalaşmış media reklamları və məmurların əlində alətə çevirilmiş xəbər saytları. 

Üçüncü daha təhlükəlidir - məmurların əlində alətə çevirilmiş media və onu alətə çevirmiş məmurlar və mövqe davaları... 

Bu barədə bir qədər sonra...

Bir qədər əvvəl Medianın İnkişafı Agentliyinin icraçı direktorunun müavini Natiq Məmmədli "dəstək müsabiqələri"nin yeni qaydalarını açıqlayıb. Qısası, dəstək müsabiqəsi dediklərinin mükafatı 3 min manat artırılaraq 5 min manata qaldırılıb. Adını da yaxşı qoyublar "Jurnalistlərin əmək haqqı qaldırılacaq". Adam gülə də bilmir.

Təbii ki, bu yardım yenə də MEDİA-nın rəhbəri Əhməd İsmayılova verilmiş konkret siyahı ilə müəyyənləşəcək. 

Hə, bu siyahını da kim verəcək, o, nə istəyir, bax, bu da maraqlıdır.  Hamımız əla bilirik ki, "dəstək müsabiqələri" dedikləri o siyahı necə hazırlanır və onun "həri"sini kim verir. 

Hamımız onu da əla bilirik ki, onun bu addımları atmaqda məqsədi MEDİA-nın nəzarətində olanları daha da gücləndirmək və nəzarət halqasını bir qədər də genişlənirməkdir. Bunu dövlətin pulu ilə, özü də "dəstək müsabiqəsi" adı altında etməkdən qorxmayaraq... 

Toxunulmaz olduğunu hiss edən adam kimi, haqqında bir cümlə yazıldığı zaman üzərinə göndərilən "ordu"suna güvənən adam kimi. O "ordu"nu mən əla tanıyıram, kim olduqlarını da bilirəm - "Dovşana qaç, tazıya tut"?  Çilddən cildə, yoldan yola...

Hə, indi gəldik çatdıq başa. O, Azərbaycan Prezident Administrasiyasının Xarici siyasət məsələləri şöbəsinin müdiri Hikmət Hacıyevdir. Hamının ondan qorxmasını istəyirlər.

Həzrət Əlinin Zülfüqarı ədalət, bərabərlik və haqqın bərpası üçün qaldırılırdı. Ədalətin qılıncı insanı qoruyar, haqqı müdafiə edərdi.

Amma adı Əli olan Media baronu Həsənov bu qılıncı 20 ildən çox müddətdə müstəqil medianın boynuna qoydu. Haqqın, sözün və həqiqətin başını kəsməyə çalışdı, kəsdi də.

Və nə qədər qəribədir… Ondan sonra bu “qılıncı” əlinə alanların adları da öz-özlüyündə böyük məna daşıyır:

Əhməd – Peyğəmbər Məhəmmədin (s) adlarından biri.

Hikmət – haqqa uyğun hökm vermək, doğru qərar deməkdir.

Amma biz nə ədalət gördük, nə hikmət, nə də haqqın qorunduğunu…

Əksinə - yol kəsdilər, basqı etdilər, baş kəsməyə hazır oldular. 

Qılıncın adı ilahi, əməlləri isə tam əksi…

Allah sizə Ədalət versin!

Çünki sizdə nə Əhmədin adı var, nə Hikmətin mənası, nə də Əlinin ədaləti…

Jurnalist Ədil Hüseynov

P.S. Bu gün bəzi “aparıcı media kapitanları” qəzet satışının sıfırlanmasından, yeni nəslin qəzet oxumamasından, Azərbaycanda yazılı mətbuatın son günlərini yaşamasından gileylənirlər və bu mənfi tendensiyanı texnologiyaların sürətli inkişafı ilə, artıq bütün qəzetlərin elektron versiyasının mövcudluğu ilə əlaqələndirirlər. Qəribədir ki, bu “arqumentləri” məhz o qəzet baş redaktorları irəli sürürlər ki, vaxtilə dövlətdən mənzil, pul mükafatları, aylıq, illik maliyyə dəstəyi, fəxri adlar, orden və medallar alıblar. Unudurlar ki, onlara dövlət dəstək verməklə, nə vaxtsa işlərini qaydaya salmaq üçün ayaqda qalmalarını təmin etmək üçün vermişdi. Və bu, əbədi ola bilməzdi. Onsuz da cəmiyyətdə bu məsələyə münasibət birmənalı deyildi. Yerlərdən etirazlar boy göstərirdi. Məsələn, suallar səslənirdi ki, jurnalistlərin müəllimlərdən, həkimlərdən nəyi artıqdır ki, onlara dövlət mənzil bağışlayır. Hələ həmin dəstəyin bölgüsündəki ədalətsizliklər bir yana dursun. İndi buyurun, hörmətli “aparıcı media kapitanları”, satın mənzilinizi, rəhbərlik etdiyiniz redaksiyaları daha bir neçə ay yaşadın, əgər ağızdolusu danışdığınız dövlətçiliyə xidmət müstəvisində səmimisinizsə.

Mətbuatın probleminin həllinin yalnız və yalnız bir yolu var ki, o da sizləri qane etməz: Yalnız həqiqəti yazmaq, daha hökumətin korrupsiyalaşmış məmurlarının yalanlarını konfet kağızına büküb oxucuya təqdim etməmək. Qəzet həqiqəti yazdığı halda oxucunun qəzetin saytında yalnız informasiyanın sərlövhəsinə, anonsuna rast gəlməsi yetərlidir ki, axtarıb qəzeti tapsın. Amma yox, sizə lazım idi ki, asılı olduğunuz məmurların, oliqarxların xalqın gözünün içinə danışdığı yalanları mümkün qədər tez tirajlayasınız.

Son illərdə görün Ramiz Mehdiyev başda olmaqla görün neçə nəfər yüksək ranqlı məmur dövlətçiliyə xəyanətə, neçə icra başçısı korrupsiyaya görə həbs olunub. Açın səhifələrinizi, göstərin görək, həmin şəxslər vəzifə başında olanda dövlətdən maliyyələşən hansı qəzetdə onların barəsində tənqidi informasiya dərc olunub. Heç birində. Əksinə, tərifləmiziniz. Hətta işi o yerə çatdırmısınız ki, hamının rüşvətxor kimi tanıdığı icra başçısının rəhbərliyi altında rayonda guya həyata keçirilən “mütərəqqi” işləri təqdir edən yazılarınızı üstəlik KİVDF-nin, MEDİA-nın layihəsi adı altında dərc etmisiniz. Həmin məmurların sonradan üstü açılan korruptiv əməllərindən yazmış olan müstəqil jurnalistləri isə sözü bir yerə qoyub “qara siyahıya” salmısınız.

Bilin, indi gileyləndiyiniz problemləri özünüz yaratmısınız, cılız maraqlarınız naminə həqiqətdən üz döndərməklə.

Gundemxeber.com