Ukrayna prezidenti Vladimir Zelenski ABŞ-ın yüksək səviyyəli nümayəndələri – vitse-prezident Cey Di Vens və ABŞ Ordusu naziri Daniel Driskoll ilə təxminən bir saat davam edən geniş müzakirə apardıqlarını bildirib.

Zelenski görüş haqqında deyib:

“ABŞ tərəfinin müharibənin dayandırılması ilə bağlı təkliflərindəki bir çox detallar üzərində danışa bildik. Məqsədimiz bu prosesi həm ləyaqətli, həm də uzunmüddətli sülh üçün effektiv etməkdir.”

Prezidentin sözlərinə görə, tərəflər ABŞ və Avropa ilə milli təhlükəsizlik müşavirləri səviyyəsində koordinasiyanın artırılması barədə razılığa gəliblər. Zelenski vurğulayıb ki, bu əməkdaşlıq sülhə aparan yolun reallaşması üçün vacibdir.

O, həmçinin ABŞ prezidenti Donald Trampın münaqişəni dayandırmaq istiqamətindəki səylərini yüksək qiymətləndirib:

“Ukrayna hər zaman ABŞ prezidentinin qan tökülməsinə son qoymaq istəyinə hörmət edib və real təklifləri müsbət dəyərləndirir.”

Zelenski əlavə edib ki, tərəflər daimi təmas barədə razılığa gəliblər və Ukrayna, ABŞ və Avropa nümayəndələri sülh mexanizminin hazırlanması üçün gecə-gündüz işləməyə hazırdır.