Böyük Britaniya hökuməti Rusiya Müdafiə Nazirliyinin Baş Kəşfiyyat İdarəsinə (GRU) və daha 11 nəfər fiziki şəxsə qarşı yeni sanksiyalar tətbiq edib. Xarici İşlər Nazirliyinin məlumatına görə, qərar 2018-ci ildə Solsberidə Sergey və Yuliya Skripalın zəhərlənməsi ilə bağlı araşdırmanın nəticələrinə əsaslanır. Həmin hadisə zamanı “Noviçok” ilə zəhərlənmiş britaniyalı Don Störjess də həyatını itirmişdi.

Araşdırmada bildirilir ki, keçmiş GRU əməkdaşı Sergey Skripal üzərinə sui-qəsd birbaşa Rusiya Prezidenti Vladimir Putinin göstərişi ilə hazırlanıb və icra olunub.

Sanksiyalar həmçinin Rusiya kiberkəşfiyyatının səkkiz əməkdaşını da əhatə edir. Londonun iddiasına görə, onlar Skripalın qızı Yuliya Skripalı qətldən beş il əvvəl zərərli proqram təminatı ilə izləməyə çalışıblar.

Bundan başqa, üç GRU zabiti Ukrayna və Avropada “düşmənçilik fəaliyyətləri”nin təşkili, o cümlədən Ukrayna supermarketlərinə qarşı terror aktlarının hazırlanmasında ittiham olunur. Britaniya tərəfi ittihamların konkret detalları barədə əlavə məlumat verməyib.

Böyük Britaniyanın Baş naziri Kir Starmer qərarı şərh edərkən, Skripal ailəsinə qarşı sui-qəsdi “təcavüz aktı” adlandırıb və Londonun Ukraynaya dəstəyinin davam edəcəyini bildirib.

Dekabrın 4-də Rusiya səfiri Britaniya XİN-ə çağırılaraq Don Störjessin ölümü ilə bağlı araşdırmanın nəticələri ilə tanış edilib. İstintaqa görə, Störjess ölümcül maddə ilə zəhərlənmiş flakonu ətir hesab edərək istifadə edib. Britaniyanın iddiasına əsasən, flakonu “Petrov” və “Boşirov” adı ilə tanınan Anatoli Çepiqə və Aleksandr Mişkin atıblar.

Sanksiya tətbiq edilən şəxslər: Denis Smolyaninov, Vladimir Lipçenko, Yuri Sizov, Boris Antonov, Anatoli İstomin, İqor Boçka, Aleksey Umets, Denis Denisenko, Dmitri Qoloşubov, Pavel Yerşov və Nikolay Kozaçek
Moskvanın reaksiyası hələlik yoxdur. Rusiya tərəfi Skripalın zəhərlənməsi və Don Störjessin ölümündə iştirakını yenidən təkzib edib. Kreml indiyədək Britaniyanın qərarına rəsmi münasibət bildirməyib.

Gundemxeber.com