II dünya müharibəsinin son aylarında dünya tarixinin əsas cinayətkarlarından biri Adolf Hitler gizli silahının köməyi ilə SSRİ üzərində qələbə qazanacağına əmin olub. Bu, 3-cü reyxin Təbliğat Nazirliyinin iqtisadi şöbəsinin keçmiş rəhbəri və Milli Sosialist Alman Fəhlə Partiyasının (NSDAP) funksioneri, quppenfürer Verner Vaxterin Rusiya Federal Təhlükəsizlik Xidməti tərəfindən yayıılan 10 oktyabr 1945-ci il dindirilmə protokolunda göstərilib.

Dünya, sözün əsl mənasında, nüvə müharibəsi və atom fəlakətinin astanasında olub. V. Vaxter bildirib ki, 1943-cü ildə keçmiş həmkarı, Almaniya Təbliğat Nazirliyində rabitə mühəndisi işləyən Dominik məxfi söhbətləri zamanı ona atom bombası istehsalı üzərində işləyən bir qrup mühəndislə ünsiyyəti barədə danışıb. Dominik Vernerə alman alimlərinin atom nüvəsinin parçalanmasına nail olduqlarını və mütəxəssislərin hazırda nüvə enerjisinin praktik tətbiqi üçün metodlar və yollar hazırladıqlarını, artıq eyni şeyi edən amerikalılar və britaniyalılardan il yarım qabaqda olduqlarını bildirib.

V. Vaxter daha sonra ifadəsində yazıb ki, gizli hökumət bülleteninin redaktoru Hans Hertel daha sonra başqa bir məxfi söhbətində ona 1945-ci ilin fevral ayında Göbbelsin əmri ilə Selle şəhərinə etdiyi səfər barədə danışıb. Hertel orada tanıdığı xüsusi təyinatlı hərbi hava qüvvələri məktəbinin rəisi polkovnik Hermann Hajo ilə görüşünü təsvir edib. Məxfi söhbət zamanı Hajo ona məktəbin SSRİ-nin Ural və Orta Asiyadakı sənaye mərkəzlərinə nüvə bombaları atmaq üçün nəzərdə tutulmuş ən son dizaynlı (reaktiv mühərrikli - Qeyd), uzun mənzilli bombardmançı təyyarələrə sahib olduqlarını bildirib.

Hertel həmçinin əlavə edib ki, Selledəki xüsusi təyinatlı qüvvələrə məxsus hava qüvvələri məktəbinin rəhbərinin sözlərinə görə, bu ən yeni alman bombardmançı təyyarələrini təkcə onun aerodromunda deyil, həm də bir sıra başqa yerlərdə yerləşən qırıcılar müşayiət edəcək.

Daha sonra V.Vexter əlavə edib ki, Hitlerin atom silahından 1945-ci ilin yayında, daha dəqiq desək, 1945-ci ilin iyun ayında istifadə etmək niyyətində olduğu qənaətinə gəlib. O, fikrini 4 iddia ilə əsaslandırıb.

1. Almaniya Təbliğat Nazirliyinin dövlət katibi doktor Naumann həmin dövrdə 3-cü reyxin fəlakətli hərbi-siyasi vəziyyəti barədə gizli iclasda Hitlerin dediklərini sitat gətirib - “Tanrı məni müharibənin son 14 gününə görə bağışlasın”. O, bu sözləri mənə dedikdən sonra vəziyyətin tezliklə kökündən dəyişəcəyinə tam əmin idim.

2. Verner Vaxter 1945-ci ilin əvvəllərində Almaniyanın faktiki silahlanma nazirinin müavini Şpeerlə silahlanma şöbəsinin müdiri Zaurla görüşüb. Hər iki şəxs gizli şəkildə ona ən son silahların istehsalı üçün sürətləndirilmiş işlərin aparıldığını və tezliklə cəbhədə istifadə olunacağını bildiriblər.

3. 1945-ci ilin yazında Verner Vaxterlə görüş zamanı Alman Tədqiqat Şurasının ixtiraçısı professor Şumann gizli şəkildə ona müharibənin gedişatını Almaniyanın xeyrinə dəyişdirəcək gizli silah üzərində geniş iş apardığını deyib.

4. 1945-ci ilin mart ayında Göbbels Təbliğat Nazirliyinin əməkdaşı fon Borkeyə şəxsən öz iştirakı ilə fürerin 1945-ci ilin iyun ayı üçün ulduz falı tərtib etməsini tapşırıb. Həmin fala görə, 1945-ci ilin iyun ayı Hitlerin üçün ən əlverişli ay olacaqmış.

Lakin Stalinin Jukova Berlini ələ keçirmək və nasist Almaniyasını mümkün qədər tez bir zamanda məhv etməsi barədə tapşırığı vəziyyəti dəyişib. Odur ki, Stalin qatil həmkarı Hitlerin nüvə silahı hazırlayıb istifadə etməsinin, ən azı bütün Avropanı xaosa və ya dəhşətli nasist diktaturasına sürükləməsinin qarşısını ala bilib. Çünki əgər nasistlər atom bombaları olan reaktiv təyyarələrdən və ya raketlərdən istifadə etsəydilər, Rokossovski, Jukov və Konevin cəbhə xəttindəki ordu qrupları, Almaniyaya yaxınlaşan digər dövlətlərin hərbçilərinin əksəriyyəti həlak olardı. Heç o zaman Almaniya təyyarələri Volqa və Urala uçmaq məcburiyyətində də qalmazdılar. Çünki atom bombası bir neçə günün içində tarixin gedişatını nasistlərin xeyrinə tam dəyişərdi./musavat.com 

İlkin Nəcəf