Azərbaycan Respublikasının Prezidenti, cənab İlham Əliyevə

1-ci vitse-prezident, Heydər Əliyev Fondunun Prezidenti, xanım Mehriban Əliyevaya

Daxili işlər naziri, yeganə hüquq müdafiəçimiz Vilayət Eyvazova

QARABAĞ QAZİLƏRİNİN QAZİ JURNALİST VÜQAR MƏMMƏDOVU MÜDAFİƏ KOMİTƏSİNİN

             MÜRACİƏTİ

Sizə üz tutmaqda amacımız 7-ci aydır gülünc, yüngül ittihamla həbsinin ağır cinayətlər məhkəməsinə daşındığı  qazi jurnalist Vüqar Tofiq oğlu Məmmədovun ağlagəlməz saxta ittihamının məntiqsiz sonucla başa çatmasına , ƏDALƏTSİZLİYİN zəfər çalmasına imkan verməməməyinizi , işi nəzarətinizə götürməyinizi diləməkdir. İttiham o qədər ağlagəlməzdir ki, sifarişin arxasında qara güclərin durduğunu deməyə əsas verir. Yoxsa adi  yüngül mülki reklam müqaviləsinin hədə-qorxu ilə bağlanılması iddiası ilə   ağır cinayət masasına “əyləşməsi” mümkün olmazdı.

Sizə dövlətin başçıları, birinci şəxsləri olaraq Konstitusiyanın təsbit etdiyi məhkəmə müstəqilliyinin  təminatçısı kimi, daxili işlər nazirinə isə yeganə hüquq müdafiəçimiz kimi üz tutmaqda haqlıyıq. Qazi jurnalist Vüqar Məmmədovun həyatına real təhlükə, təhdid var! Reklam müqaviləsinin şantajla bağlanılması ağlasığmaz məntiqsizliyilə qazini 7-ci aydır azadlığından məhrum edənlər nəyə desən əl ata bilərlər. 

DİN-in 102 xidməti gecə-gündüz bilmədən müraciətləri qəbul edən, ypnləndirən DÖVLƏT qurumudur. “Yuxusunu tərs görənlər, qarışdıranlar”dan tutmuş yuxu görə bilməməyə tutmuş bu xidmətə şikayət olunur. Vüqar Tofiqoğlu ilə bağladıqları müqavilədən narazı olanlar, müqavilənin hədə-qorxu predmeti olduğunu, “yuxularını tərsinə qarışdırdığını” deyənlər nə əcəb DİN-ə müraciət etməyiblər, “yatıb-yatıb, birdən “biqəfil” ayılıblar” ki, qazi jurnalist müqaviləni (guya) şantajla bağladıb. Niyə müqavilənin-əqdin etibarsız hesab edilməsi tələbi ilə mülki məhkəmə icraatı qaydasında iddia qaldırılmayıb? Haçandan mülki reklam müqaviləsinin, daha düzü, tənqidə qadağa qoymaq öhdəliyinin qanunsuzluğu DÖVLƏTƏ TƏHLÜKƏ sayılır?

 Vüqar Məmmədov DÖVLƏTə təhlükə olmasa da, indi həyatına real təhlükə var. Durum çox ağırdır, məhkəmə hakimiyyəti yox (olsaydı, 7 -ci aydır saxta ittihamla həbsdə saxlanmazdı), prokuror nəzarəti yox (olsaydı, mülki reklam müqaviləsinin dövlət təhlükəsizliyinə qarşı olmadığı əsası ilə anında CPM-in 209.7-ci maddəsi tətbiq edilərdi), millət vəkili, ombudsmanı, MEDİAsı, Mətbuat Şurası yox (olsaydı, qazinin, jurnalistin , media orqanının qələmhaqqının reklamdan çıxdığına bir işarə vurulardı, qazi kimi müdafiə olunardı), müdafiəçi vəkili isə heç saya salan yox. Yeganə hüquq müdafiəçimiz DİN, nazirin özüdür! 

Hörmətli DÖVLƏT, HÜQUQ ADAMLARI! Sizdən qazi jurnalist Vüqar Məmmədovun həyatına real təhlükəni önləmək, ƏDALƏTİN ZƏFƏR çalmasını təmin etmək üçün ağlagəlməz, vicdanasığmaz  cinayət işinin nəzarətə götürülməsini, qazi jurnalisti özəl QORUMA altına almağınızı diləyirik.

Mərhum Prezident Heydər Əliyevin 103-cü doğum günü ilə bağlı 7-ci aydır məhbəs yaşamına məcbur edilən Vüqar Məmmədovun ev dustaqlığına buraxılmasını, Fəxri Xiyabanı, Şəhidlər Xiyaban(lar)ını ziyarət etməsini təşkil və təmin etmək bağlantılı orqanların üzərinə düşür.

Məğrur Bədəlsoy,

 Qarabağ Qazilərinin Qazi Jurnalist Vüqar Məmmədovun Hüquqlarını Müdafiə Komitəsinin baş katibi, 1-ci d. Qarabağ qazisi 06.05.2026-cı il (DİN Hospitalı, 429-cu palata)

Gundemxeber.com