ABŞ Milli Kəşfiyyat Agentliyinin (ODNI) keçmiş rəhbəri Talsi Qabbard COVID-19 virusunun mənşəyi ilə bağlı gizli sənədləri açıqlayıb. Talsi Qabbard açıqlaması ilə qlobal pandemiya ətrafındakı müzakirələri yenidən alovlandırıb. Təqribən 400 səhifəlik hesabat və daxili kəşfiyyat yazışmaları illərdir konspiroloji nəzəriyyə adlandırılan bəzi iddiaları rəsmi sənədlərin dili ilə yenidən gündəmə gətirib. Kəşfiyyat sənədlərində Çinin Vuhan Virusologiya İnstitutunda (WIV) ABŞ tərəfindən maliyyələşdirilən araşdırmalar və ABŞ-ın keçmiş baş infeksionisti doktor Entoni Fauçinin fəaliyyəti arasında ciddi ziddiyyətlər bəyan edilir. Lakin sənədlərin tam məzmunu və onların hüquqi-siyasi nəticələri Vaşinqtonda fərqli şəkildə şərh olunur.

Talsi Qabbard tərəfindən rəsmən açıqlanan sənədlərdə, xüsusilə “Lawrence Livermore” laboratoriyasının hesabatına istinadən qeyd olunur ki, Vuhan laboratoriyasındakı şərait və tədqiqat proqramları koronavirusun insanlara keçməsini sürətləndirəcək funksiya gücləndirilməsi (gain-of-function) elmi təcrübələri üçün tam əlverişli olub. Sənədlər həmçinin ABŞ Mərkəzi Kəşfiyyat İdarəsinin (MKİ) bəzi analitiklərinin hələ 2021-2023-cü illərdə kovidin laboratoriya sızıntısı ssenarisini ən real variant hesab etdiklərini, lakin bu tapıntıların rəhbərlik tərəfindən sıxışdırıldığını iddia edən daxili şahid ifadələrini ortaya qoyur.

Ən səs-küylü məqamlardan biri dr. Entoni Fauçinin 2024-cü ildə Konqres qarşısında and içməklə verdiyi ifadələrlə bağlıdır. Hesabatda iddia olunur ki, Fauçi ABŞ Milli Allergiya və İnfeksion Xəstəliklər İnstitutunun (NIAID) rəhbəri olduğu dövrdə Vuhandakı uçan siçan virusları tədqiqatlarının maliyyələşməsinə birbaşa nəzarət edib və onun kəşfiyyat rəylərinə təsir göstərmək cəhdləri Konqresə dediyi ifadələrlə ziddiyyət təşkil edir. Qabbard mövzu ilə bağlı verdiyi bəyanatda bildirib: “İllərlə davam edən yalanlar, senzura və ört-basdırdan sonra Amerika xalqı şəffaflığa və həqiqətə layiqdir”.

Bu ağır ittihamlara baxmayaraq, dr. Fauçini hər hansı bir hüquqi cəza və ya məhkəmə prosesinin gözləmədiyi artıq dəqiqdir. Belə ki, ABŞ-ın eks-prezidenti Co Bayden vəzifə müddətinin son günündə - 20 yanvar 2025-ci ildə dr. Entoni Fauçi üçün qabaqcadan (preemptive) tam və şərtsiz əfv fərmanı imzalayıb. Bu fərman Fauçinin 2014-cü ildən bəri NIAID rəhbəri və Ağ Evin tibbi məsləhətçisi kimi fəaliyyəti dövründə törədilə biləcək hər hansı federal cinayətə görə gələcəkdə təqib olunmasını hüquqi olaraq qeyri-mümkün edir. Co Bayden bu addımı atarkən bəyan edib ki, bu əfv qərarı dr. Fauçinin hər hansı bir cinayət törətməsinin və ya günahı boynuna almasının təsdiqi deyil:

“Əfvlərin verilməsi hər hansı bir şəxsin qanunsuz fəaliyyətlə məşğul olduğunun etirafı kimi başa düşülməməlidir. Dr. Fauçi yarım əsrdən çox ölkəmizə xidmət edib və əsassız siyasi təhqiqatlardan qorunmalıdır”.

Dr. Fauçi özü də ittihamları qətiyyətlə rədd edərək, heç bir qanunsuz fəaliyyət göstərmədiyini, həm təbii mənşə, həm də laboratoriya qəzası ssenarilərinin elmi cəhətdən hələ də araşdırıldığını bildirib. Tənqidçilər və mühafizəkar dairələr, xüsusilə senator Rend Pol kimi fiqurlar, Baydenin bu tələsik əfv fərmanını pandemiya məsuliyyətinin gizlədilməsi və iddiaların faktiki etirafı kimi qiymətləndirirlər. Onların fikrincə, Ümumdünya Səhiyyə Təşkilatının (ÜST) və digər qlobal qurumların prosesdəki rolu hələ də qaranlıq qalır və böyük farmasevtika şirkətlərinin ("Big Farma") pandemiyadan trilyonlarla dollar qazanc əldə etməsi bu şübhələri daha da dərinləşdirir.

Bununla belə, ABŞ kəşfiyyat icmasının daxilində virusun mənşəyinə dair hələ də tam konsensus yoxdur; bəzi agentliklər hələ də təbii mənşə versiyasına üstünlük verir. Lakin Qabbardın son sənəd sızdırması COVID-19-un əsrə bərabər olan böyük bir siyasi və kəşfiyyat müharibəsinin aləti olmasını ortaya qoyur.

Gundemxeber.com