İyulun 7-də AMEA Mərkəzi Elmi Kitabxanasında vətənpərvər ziyalı, əmək veteranı, xeyriyyəçi Hacı Cavad Əliyevin ideya rəhbərliyi və sponsorluğu ilə ərsəyə gəlmiş, “İmza” Nəşrlər Evində nəfis tərtibatla çap olunmuş “Heydər Əliyev həyat yolu” (müəllif Sabir Hüseynov) və “Qalib xalqın ruhnaməsi” (müəllif Pünhan Şükür) kitablarının təqdimat mərasimi keçirilmişdir.

Azərbaycanın dövlət himni səsləndirildikdən və Vətən uğrunda canlarını fəda etmiş şəhidlərimizin ruhu bir dəqiqəlik sükutla yad edildikdən sonra tədbirin moderatoru, hər iki kitabın redaktoru, tarixçi, tədqiqatçı Nazim Tapdıqoğlu giriş sözü ilə çıxış edərək, tədbir iştirakçılarına kitablar və müəllifləri haqqında məlumat verdi: “Təqdim olunan “Heydər Əliyev həyat yolu” kitabında fenomenal şəxsiyyət, böyük siyasətçi Heydər Əlirza oğlu Əliyevin zəngin və mənalı ömür yolundan söhbət açılır, bəzi tanınmış ziyalıların onun haqqında xatirələri əks olunur... “Qalib xalqın ruhnaməsi” kitabında isə Qafqaz Müsəlmanları Ruhani İdarəsinin Vətən müharibəsində Böyük Zəfərin qazanılmasına verdiyi mənəvi töhfələrdən bəhs edilir. Özəlliyi də ondan ibarətdir ki, bu kitab, özünün əhatə etdiyi mövzuya ölkəmizin suverenliyinin tam bərpasından sonrakı, yeni reallıq prizmasından yanaşmanı ortaya qoyur...”

Tədbirin aparıcısı daha sonra kitabların ideya rəhbəri və nəşrinin sponsoru Hacı Cavad Əliyev barəsində danışdı: “Doğma Neftçala rayonunda el ağsaqqalı kimi tanınan, ölkənin dini ictimaiyyəti arasında nüfuza malik Hacı Cavad Mirzağa oğlu uzun müddət Qafqaz Müsəlmanları İdarəsinin vacib strukturlarından birində məsul vəzifədə işləmiş, 1990-cı ilin 20 Yanvar hadisələrində, azadlıq mücadiləsi aparan xalqımızın hüznlü günlərində Şeyx Hacı Allahşükür Paşazadə və digər vətənpərvər ziyalılarla çiyin-çiyinə olmuşdur. O, həm də Vətən müharibəsində Füzuli və Cəbrayıl rayonlarının düşməndən azad olunması uğrunda gedən döyüşlərdə şücaət göstərərək şəhid olmuş, ölümündən sonra "Azərbaycan Bayrağı" ordeni ilə, "Vətən uğrunda" medalı ilə təltif olunmuş rəhmətlik leytenant Mirzağa Məmmədbağır oğlu Əliyevin əmisidir...”

Sonra söz müəlliflərə verildi.

Sabir Hüseynov öz nitqində vurğuladı ki, ümummilli lider Heydər Əliyevin Azərbaycana həm birinci, həm də ikinci dəfə rəhbərlik etdiyi illər Azərbaycan tarixinin şərəfli səhifələrini təşkil edir və ulu öndərin irsinə və həyat yoluna həsr olunmuş nəşrlər indiki və gələcək nəsillər üçün dövlətçilik tariximizin, dahi rəhbərin uğurla müəyyənləşdirdiyi siyasi prioritetlərimizin öyrənilməsi və dəyərləndirilməsi baxımından həmişə əhəmiyyətli sayılacaq.

Pünhan Şükür çıxışında qeyd etdi ki, əhalisinin say tərkibində müsəlmanların dominant çoxluq təşkil etdiyi Azərbaycan cəmiyyətində dinlərarası və konfessiyalararası tolerant mühitin formalaşmasına, azad və müstəqil konfesional baxış və düşüncələrə Qafqaz Müsəlmanları İdarəsi əhəmiyyətli töhfə vermişdir: “Vətən müharibəsində Şanlı Qələbənin əldə edilməsində xalqla dövlətin birliyi, inamı nə qədər vacib idisə, iman da o qədər vacib idi. Hacı Allahşükür Paşazadənin rəhbərliyi ilə Qafqaz Müsəlmanları İdarəsi azərbaycanlıların qəlbindəki iman işığının öləziməməsi, onun daim parlaması üçün mümkün olan hər şeyi etmişdir...”

Çıxış üçün söz verilən tarix elmləri doktoru, Bakı Dövlət Universitetinin Qafqaz xalqları tarixi kafedrasının professoru, Azərbaycan Universitetinin Humanitar fənlər fakültəsinin İctimai elmlər kafedrasının müdiri Qabil Əliyev Azərbaycanda Hacı Zeynalabdin Tağıyev xeyriyyəçilik ənənələrinin Hacı Cavad Əliyev kimi alicənab insanlar tərəfindən davam etdirilməsini, xüsusən maarifçilik müstəvisində görülən xeyirxah işləri alqışladı. Xatırlatdı ki, qanlı 20 Yanvar hadisəsinə ilk olaraq öz münasibətini bildirən şəxslər ümummilli lider Heydər Əliyev və Şeyx Hacı Allahşükür Paşazadə olmuşlar: “Belə ki, Heydər Əliyev 21 yanvar 1990-cı il tarixdə faciə ilə əlaqədar Azərbaycanın Moskvadakı daimi nümayəndəliyində keçirilən yığıncaqda çıxış edərək bu hadisəni törədən şəxsləri kəskin şəkildə tənqid edib. Heydər Əliyev bu hadisəni hüquqa, demokratiyaya yad, humanizmə və ölkədə elan olunmuş hüquqi dövlət quruculuğu prinsiplərinə zidd hesab etdiyini bildirib. 1990-cı ilin 20 yanvar qırğını Azərbaycanda prosesləri dəyişdirən məhək daşı oldu. Mixail Qorbaçov ordunun şəhərə girməsinin rəsmi səbəbini Azərbaycanda hakimiyyəti ələ keçirmək istəyən “islam fundamentalistləri” ilə mübarizə kimi göstərdi. O, sovet xalqına müraciətində utanmadan bildirdi ki, “Azərbaycanda islam üsul-idarəsinin bərqərar olunmasına cəhd edilib”. Məhz bu zaman Allahşükür Paşazadə Kremli, şəxsən SSRİ prezidenti Mixail Qorbaçovu ittiham edən bəyanatla çıxış etdi. Şeyx SSRİ rəhbərini bu qanlı qırğına görə lənətlədi. Bu bəyanat bütün dünyada böyük rezonans doğurdu. Odur ki, bu gün təqdim olunan kitablarda həmin hadisələrə bir daha işıq tutulması təqdirəlayiq addımdır...”

Bakı Dövlət Universitetinin dosenti, kimya elmləri namizədi Əhməd Əhmədov çıxışında əbədiyaşar lider Heydər Əliyev haqqında yazdığı məqaləyə “Heydər Əliyev həyat yolu” kitabında yer ayırdıqlarına görə sponsora və müəllifə təşəkkürünü bildirdi. Qeyd etdi ki, dahi şəxsiyyətin siyasi müdrikliyi, məqsədyönlü siyasi strategiyası dövlətimizin və xalqımızın gələcək intibahı üçün əsl bünövrə olmuşdur...

AMEA Memarlıq və İncəsənət İnstitutunun aparıcı elmi işçisi, Azərbaycan Memarlar ittifaqının üzvü, memarlıq namizədi Rizvan Qarabağlı öz çıxışında yada saldı ki, Heydər Əliyev gənc yaşlarından memarlıq sənətinin vurğunu olmuş, SSRİ xalqlarını simasızlaşdırmaq məqsədi daşıyan sovet mərkəzi hakimiyyətinin tələblərinin ziddinə olaraq, memarlarımızın qarşısına müasirliklə bərabər milli xüsusiyyətləri əks etdirən əsərlər ortaya qoymalarını istəmişdir. Rizvan Qarabağlı xüsusi vurğuladı ki, işğaldan azad olunmuş Qarabağ və Şərqi Zəngəzur ərazisindəki erkən orta əsr alban məbəd və kilsələrində ermənilərin məkrlə əlavə etdikləri nişanələrin aşkarlanması, düşmənin pozub saxtalaşdırdığı alban yazıları və simvollarının bərpası işi səliqəli şəkildə həyata keçirilməli, qədim memarlıq abidələrinin adları, inşa tarixləri, koordinatları yenidən sənədləşdirilərkən səhvlərə yol verilməməlidir.

Sonra tədbirin ən ahıl iştirakçısı, nəğməkar şairə Şərafət Dağıstanlı toplantının ruhuna uyğun şeirlərini söylədi.

Təqdim olunan yeni publisistik nəşrlərin yaradıcı heyət üzvlərindən jurnalistlər Xuraman Quliyeva, Rizvan Əhmədli çıxışlarında bildirdilər ki, texniki və bədii tərtibatı üzərində çalışdıqları kitablarda ehtiva olunan mövzuların əhəmiyyəti onların işinin məsuliyyətini və şövqünü daha da artırmışdır.

Hacı Cavad Əliyev yekun nitqi söyləyərək, dəvəti qəbul edib təqdimat mərasiminə gələn iştirakçılara – elmi ictimaiyyət və media nümayəndələrinə, tədbirin təşkilinə göstərdiyi köməkliyə görə AMEA MEK kollektivinə minnətdarlığını bildirdi. Söz verdi ki, bundan sonra da imkanı yetəcək qədər vətənin, xalqın və dövlətin mənafeyinə xidmət edən yeni nəşrlərin, istedadlı yazarların əsərlərinin işıq üzü görməsinə köməkliyini əsirgəməyəcək.

Sonda tədbir iştirakçılarına müəlliflərin imzaları ilə kitab nüsxələri bağışlanıldı və xatirə şəkilləri çəkildi.

Gundemxeber.com