Redaksiyamıza daxil olan məlumata görə, ölkədə fəaliyyət göstərən sahibkarlar arasında baş verdiyi iddia edilən insident hüquqi müstəvidə araşdırılmalı olan məsələ kimi diqqət çəkir.

Məlum olduğu kimi, Azərbaycanda sahibkarlığın inkişafı dövlət siyasətinin əsas istiqamətlərindən biridir. Dövlət tərəfindən biznes mühitinin yaxşılaşdırılması, investisiyaların təşviqi, sahibkarların hüquqlarının qorunması və sağlam rəqabət mühitinin formalaşdırılması istiqamətində ardıcıl tədbirlər həyata keçirilir. Məqsəd özəl sektorun inkişafına təkan vermək, iqtisadiyyatın güclənməsinə və əhalinin rifahının yüksəlməsinə nail olmaqdır.

Lakin gundemxeber.com-un redaksiyasına daxil olan məlumatda iddia olunur ki, bəzi şəxslər biznes mübahisələrinin həlli zamanı qanuni mexanizmlərdən istifadə etmək əvəzinə, öz maraqlarını təzyiq və zor tətbiq etməklə təmin etməyə çalışırlar.

İddiaya əsasən, Nazim adlı iş adamı bir neçə gün əvvəl tanınmış sahibkar Arzu Kazımovun ofisinə gələrək aqressiv davranış nümayiş etdirib. Bildirilir ki, həmin hadisə zamanı ofisdə əmlaka ziyan dəyib, əməkdaşlar narahatlıq və gərginlik yaşayıblar. Məlumatda qeyd olunur ki, qarşı tərəfə müəyyən tələblər zor tətbiq edilməklə qəbul etdirilməyə çalışılıb.

Hazırda redaksiyamızın sərəncamında bu iddiaları təsdiq edən rəsmi hüquq-mühafizə orqanlarının açıqlaması və ya məhkəmə qərarı yoxdur. Bu səbəbdən hadisə ilə bağlı səsləndirilən məlumatlar yalnız redaksiyaya daxil olmuş iddialardır və aidiyyəti dövlət qurumları tərəfindən araşdırılmalıdır.

Əgər iddialar öz təsdiqini taparsa, belə hərəkətlər sahibkarlıq fəaliyyətinin prinsiplərinə, qanunun aliliyinə və sağlam biznes mühitinə zidd hesab oluna bilər. İstənilən kommersiya mübahisəsi yalnız qanunvericilikdə nəzərdə tutulmuş hüquqi mexanizmlər vasitəsilə həll edilməli, zorakılıq və təzyiq üsullarına yol verilməməlidir.

Ümid edirik ki, hüquq-mühafizə orqanları redaksiyamıza daxil olmuş məlumatı obyektiv araşdıracaq, hadisənin bütün təfərrüatları müəyyən ediləcək və hər hansı qanun pozuntusu baş veribsə, buna hüquqi qiymət veriləcək. Eyni zamanda, hadisə ilə bağlı adı çəkilən şəxslərin mövqeyini də dərc etməyə hazır olduğumuzu bildiririk. Redaksiyamız mövzu ilə bağlı qarşı tərəfin rəyini dərc etmək hüququnu tanıyır və təqdim ediləcək açıqlamanı olduğu kimi yayımlamağa hazırdır.

Gundemxeber.com