Bu barədə Sima Babayeva facebook səhifəsində paylaşım edib.

Paylaşımı olduğu kimi diqqətinizə çatdırırıq:
“Mingəçevir şəhəri Puşkin  küçəsi 14/1, mənzil 9 ünvanında yaşayan Allahverdiyev Allahverdi Əli oğlu bir işbazın özbaşınalığı və yerli icra hakimiyyətinin bu məsələyə etinasızlığından şikayət edir.

Beləki, onun dediyinə görə Fazil Allahverdiyev adlı şəxs Heydər Əliyev 56 və Puşkin küçəsi 14/1 ünvanlarında binaların qarşısındakı iki məhəlləni ələ keçirərək “Balıq evi” və mehmanxana tikib. Uşaq meydançasını  zəbt edərək avtodayanacaq edib.
İndi də şikayətçinin yaşadığı binanın qabağında mehmanxana ucaldır. Obyektin 1-ci mərtəbəsi tam inşa olunub, 2-ci mərtəbəni qaldırmaq üçün isə demir-beton konstruksiyalar artıq gətirilib.

Otel hazır olanda qarşıdakı yaşayış evinin eyvanları, pəncərələri ilə arada 1-2 mertlik məsafə qalacaq. Hətta bu adam sakinlərin həyətdə əyləşib istirahət etdikləri kiçik bağ yerini də tutaraq ağacların suvarılmasına imkan vermir ki, ağaclar qurusun, sonra da onların kəsib tikinti apardığı ərazini genişləndirsin.

Şikayətçi Allahverdi Allahverdiyev deyir ki,
şəhər icra hakimiyyətinin başçısı İlham İsmayılov keçirdiyi səyyar görüşlərdə hər guşədə nümunəvi məhəllər yaratdıqlarını bildirir.

Cənab başçının “nümunəvi həyət” anlayışı Fazil Allahverdiyevin apardığı tikinti işləri də aiddirsə, bu çox pis nümunədir. Yeyib-içib dəmlənmiş müştərilərin səsi, balıq iyi, kabab iyi, qatı tüstü, günün bütün saatlarında gəlib-gedən avtomobillərin sədasıi sakinlərin rahatlığını əlindən alıb. Bununla bağlı İcra başçısı İlham İsmayılova müraciət olunub.

O isə cavabında bu məsələnin icra hakimiyyətinə aid olmadığını, Tikintidə Təhlükəsizliyə Nəzarət Dövlət Agentliyinin və Dövlət Şəhərsalma və Arxitektura Komitəsinin məsuliyyət daşıdığını bildirib.

İndi söz  Dövlət Şəhərsalma və Arxitektura Komitəsinin sədri cənab  Anar Quliyevindir. Buyurub məsələyə aydınlıq gətirsin görək bu inşaat işlərinə həqiqətənmi onun rəhbərlik etdiyi komitə şərait yaradıb?

Biz də öz adımızdan xahiş edirik ki, Anar müəllim H.Əliyev 56 və Puşkin küçəsi 14/1 ünvanlarında aparılmış tikintilərlə bağlı komissiya yaradılmasını, şikayətçilərin və medianın da işitirakı ilə əraziyə baxış keçirilməsini və müvafiq qaydada ölçü götürülməsini təmin etsin.

Qeyd edim ki, Mingəçevir sakinlərindən gələn şikayətlərlə əlaqədar həm icra hakimiyyəti ilə, həm də bələdiyyə ilə əlaqə saxlamaq istədim. Lakin mümkün olmadı. Bələdiyyə sədri Anar İsmayılov mobil nömrəsini koda qoyduğu üçün ona ümumiyyətlə zəng çatmır.

Dedilər ki, ona ancaq “WhatsApp” vasitəsilə zəng çatır. Bu dəfə cavab verib icra hakimiyyətində iclasda olduğunu bildirdi. Vaxt ötdü, amma Anar İsmayılovdan xəbər çıxmadı. Bu dəfə icra hakimiyyətinə zəng vurub bələdiyyə sədri Anar müəllimin dediyi “iclas”ın nə vaxt bitəcəyini, Anar İsmayoluvun hazırda orada olub-olmadığını soruşdum. Əvvəl danışdığım əməkdaş özünü humanitar şöbənin müdiri kimi təqdim edərək bu barədə heç bir məlumat verə bilməyəcəyini bildirdi.

Ardından Hikmət adlı başqa işçi ilə danışdım. O da sükan arxasında olduğunu, mənimlə danışsa, qəza törədə biləcəyini deyib əlaqəni kəsdi. Sonradan bildim ki, “iclasdayam” sözü Anar İsmayılovun sevimli bəhanəsidir.

Hamını bu bəhanə ilə “yola verir”. Yəqin bələdiyyə sədrinin bu şakərini icra başçısı İlham müəllim də bilir. Ona görə iş birlikləri alınır. Daha Mingəçevirdə mənimsəmədikləri künc-bucaq da qalmayıb. Vətəndaşı aldadır, jurnalisti aldadır, görəsən bunlar bu hərəkəti etməklə nə düşünürlər?

İlham İsmayılovun yəqin xəbəri var ki, alıb satmaqda şəriki olan Anar İsmayılov Qarabağ müharibəsi vaxtı Goranboyda hərbi çağırışçıların avtobusundan düşərək aradan çıxıb. Bunun adının nə olduğunu hamı bilir. Deyilənə görə bu biabırçılığı ört-basdır etmək üçün hərbi komissarlığa 10 min manat ötürüb, bir müddət sonra rüşvəti almış hərbi çağırış məmuru məsuliyyətə cəlb olunub.

İcra hakimiyyətinin başçısı indi guya qanunauyğun olaraq müraciəti təyinatı üzrə Arxitektura Komitəsinə yönəldir. Qanuna belə əməl edənsinizsə, çoxdan edərdiniz. İcra hakimiyyəti başçısı dövlət başçısının yerlərdəki təmsilçisi hesab olunur.

Problemi kiməsə yönəltməkdənsə, vətəndaşa kömək edib o problemi həll etmək elə birbaşa sizin vəzifənizdir. Sizi kimiləri Ramiz Mehdiyev vaxtında çox arxayın edib, ona görə özünüzü toxulmaz sayırsınız.

Ziya Məmmədovun xahişi, Zeynal Nağdəliyevin razılığı, Ramiz Mehdiyevin xeyir-duası ilə o kreslonu tutan Mingəçevir Şəhər İcra Hakimiyyətinin başçısı İlham İsmayılovun öz fəaliyyəti əsl araşdırma mövzusudur.

Fəhləlikdən başlayıb yüksək məqam sahibi olandan sonra keçmişi unutmaq, fəhləyə, kadıba, şəhid ailəsinə kəm baxmaq yaxşı iş deyil.

İndi İlham və Anar İsmayılovlar troll sürüsünü işə salıb üstümə göndərirlər. Hərə bir söz yazır. Biri də var, Esmira adında. Məlum oldu ki, bu xanım vaxtilə FETÖ-nün maliyyəsi ilə çap olunan “Zaman” qəzetində təmizləyici olub.

Yəni, xadimə. İndi nə gördü, nə eşitdisə, çəkib icra hakimiyyətindəki bəzi adamlara çatdırır. Hətta vaxtilə fetöçuların ayağının altını süpürən bu Esmiranın hərdən icra başçısının otağını süpürdüyünü də görən olub.

Başqa bir canfəşanlıq edən adam özünü yerli televiziya rəhbəri kimi təqdim edən Murad adlı şəxsdir. O da şəhid ailəsinin şikayəti ilə bağlı yazdığım məqalə ilə əlaqədar mənə zəng vurub müzakirə etdi, sonra isə guya onların şəhid statusunun olmaması haqqında rəy yazıb.
Bu barədə Müdafiə Nazirliyinə sorğu vermişəm. Cavabı alan kimi ictimailəşdirəcəm. Buradan Murad müəllimə bildirirəm ki, bunu da elə yerli strukturlar sorğu verərək araşdırmalı idilər. Deməli, bu bir daha sübut edir ki, icra hakimiyyəti məmurları adi araşdırma prosedurunu da bilmirlər. Ya da özlərini əziyyətə salmaq istəmirlər.”/xalq.online/