"Real Madrid"in hücumçusu Kilian Mbappe Fransa millisini qoruyan polis əməkdaşlarına külli miqdarda pul köçürməsi ilə bağlı inzibati araşdırma obyektinə çevrilib.

Gundemxeber.az xəbər verir ki, bu barədə "RMC Sport" məlumat yayıb.

Fransa milli futbol komandasının təhlükəsizliyini təmin edən Respublika Təhlükəsizlik Qüvvələrinin (CRS) 5 üzvü 2023-cü ildə Mbappedən xeyli miqdarda pul alıblar. Bu, Fransa Milli Polisinin (IGPN) Baş Müfəttişliyinin diqqətini cəlb edib və inzibati araşdırmaya başlanılıb.

Dörd işçinin hər biri 26 yaşlı forvarddan 30 000 avro alıb. Pul 2023-cü ilin iyununda Mbappenin adına olan bank hesabından köçürülüb. 5-ci alıcı, mühafizəçilər qrupuna rəhbərlik edən komandirdir. Onun hesabına isə 60 300 avro köçürülüb. Beləliklə, ödənilən ümumi məbləğ 180 300 avro təşkil edib.

Fransa polisi ən böyük məbləği alan CRS komandirinin rolu ilə xüsusilə maraqlanır.

Bildirilir ki, bu, özəl təhlükəsizlik xidmətləri üçün gizli ödəniş ola bilər. Komandirin 2023-cü ilin yayında Mbappenin Kamerun və Voklüz departamentinə şəxsi səfərləri zamanı iştirak etdiyi və bu, peşə etikasının pozulması ilə bağlı şübhələri artırdığı deyilir. Hesab edilir ki, o, mandatından kənarda bu səfərlərdə iştirak edərək "dürüstlük borcunu" pozmuş ola bilər.

Qeyd olunur ki, Mbappe bu vəziyyətlə bağlı bütün suallara cavab verməyə hazır olduğunu bildirib.

Gundemxeber.az