Avqustun 10-da baş vermiş 7,4 bal gücündə zəlzələnin nəticələrini aradan qaldırmaq məqsədilə Kolumbiyada "iqtisadi fövqəladə vəziyyət" elan olunub.

Paytaxt Boqotadakı San-Karlos Sarayında çıxış edən prezident Abelardo De la Espriella zəlzələdən zərər çəkmiş bölgələrin iqtisadiyyatını canlandırmaq üçün bir sıra tədbirlərin qəbul edildiyini açıqlayıb. Bu tədbirlərin həm zəlzələdən zərər çəkənlərə təcili yardım göstərməyi, həm də iqtisadi bərpanı sürətləndirməyi hədəflədiyini bildirən De la Espriella deyib: "Bu böhranın öhdəsindən gəlmək üçün konstitusiyamızda nəzərdə tutulmuş bir mexanizm olan 'iqtisadi fövqəladə vəziyyət' elan etmək qərarına gəldik".

Zəlzələnin ölkənin dövlət maliyyəsi baxımından xüsusilə çətin bir dövründə baş verdiyini vurğulayan De la Espriella deyib ki, fövqəladə vəziyyətə reaksiya tədbirləri həm də iqtisadiyyatı canlandırmağa yönəlmiş addımları əhatə etməlidir. Hökumət bu vəziyyətə cavab olaraq təbii fəlakətdən zərər çəkmiş ailələr və istehsalat sektorları üçün müvəqqəti dəstək paketi hazırlayır. Paketə kommunal ödənişlərdə yardım, kirayə subsidiyaları, vergi güzəştləri və fəlakət qurbanlarına maliyyə yardımı daxildir.

De la Espriella fövqəladə vəziyyətin nəticələrini aradan qaldırmaq məqsədilə milli və beynəlxalq resursları idarə edəcək və yönləndirəcək bir qurumun yaradıldığını elan edib. O, "Möcüzə Fondu" adlandırılan bu mexanizmin vəsaitləri zəlzələdən zərər çəkmiş bölgələrdə bərpa işlərinə yönəldəcəyini bildirib.

Fondun təmin edəcəyi faydaları vurğulayan De la Espriella qeyd edib ki, bu mexanizm prioritet infrastruktur layihələrinin, xüsusilə də zəlzələ zamanı zədələnmiş xəstəxanaların, məktəblərin, yolların və hava limanlarının bərpası üçün maliyyə vəsaiti ayıracaq.

Qeyd edək ki, avqustun 10-da Kolumbiyada baş vermiş 7,4 bal gücündə zəlzələ nəticəsində həyatını itirənlərin sayı 273-ə çatıb.

Gundemxeber.org