Türkiyə texnoloji müstəqilliyini möhkəmləndirmək və innovativ həlləri strateji sektorlara inteqrasiya etməklə qlobal süni intellekt (Sİ) mərkəzinə çevrilmək üçün yeni hərtərəfli fəaliyyət planını elan edib. Plan 5 milyon nəfərin süni intellekt üzrə təhsil almasını, 110 min mütəxəssisin hazırlanmasını və 2030-cu ilədək məlumat toplama mərkəzlərinin gücünün 1 giqavata çatdırılmasını hədəfləyir.

Prezident Rəcəb Tayyib Ərdoğan "2026–2030-cu illər üzrə Türkiyənin Süni İntellekt Fəaliyyət Planı" haqqında sərəncam imzalayıb. Ölkənin Sənaye və Texnologiya Nazirliyi Türkiyənin baxışını texnoloji suverenlik və davamlı rəqəmsal transformasiya məqsədləri ilə uyğunlaşdırmaq üçün yeni yol xəritəsinin hazırlanması prosesinə dəstək olacaq.

Bu təşəbbüs iki il ərzində 81 vilayətdə 5 milyon vətəndaşa Sİ  təlimlərinin keçirilməsini hədəfləyir. Bundan başqa 10 min aparıcı mütəxəssis və 100 min tətbiqi sahə eksperti hazırlamaq üçün milli istedad proqramına start verilib.

Türkiyə 2030-cu ilədək   məlumat toplama mərkəzlərinin gücünün 1 giqavata çatdırılmasını hədəfləyir. Hökumət hesablama resurslarına çıxışı genişləndirmək üçün tədqiqatçılara, startaplara və kiçik biznes subyektlərinə 20 milyon GPU-saat kvotası ayırıb.

Plan dövlət qurumlarının investisiya büdcələrinin ən azı 2%-ni süni intellekt layihələrinə yönəltməsini tələb edir. Prioritet istiqamətlərdə, əsasən səhiyyə, energetika və intellektual istehsalat sahələrində sektoral pilot proqramların icrasına başlanılıb. Hökumət həmçinin enerjiyə və infrastruktura birbaşa çıxışı olan kampuslarda süni intellektin inkişafı zonalarının təsis edilməsi barədə qərar qəbul edib.

Bundan əlavə, rəsmi strukturlar süni intellekt üzrə tədqiqat fondunu, eləcə də yerli təşəbbüslərin maliyyələşdirilməsi üçün inkişaf fondunu təsis ediblər.

Yol xəritəsi mütəxəssisləri türk dilləri üzrə sektoral dil modellərini və fiziki robototexnika həllərini hazırlamağa və ixrac etməyə təşviq edir.

Gundemxeber.org