02:16

Türkiyədə fövqəladə hadisə baş verib.

gundemxebertv.com APA-ya istinadən xəbər verir ki, Türkiyə Silahlı Qüvvələrinin Baş Qərargahından mediaya göndərilən mesajda ordunun ölkə üsuli-idarəsini ələ keçirdiyi bildirilib.

İyulun 15-də axşam saatlarından etibarən Türkiyə Cümhuriyyətinin paytaxtı Ankarada anormal vəziyyət yaşanmaqdadır. Silahlı Qüvvələrin Baş Qərargahından silah səslərini gəlməsindən sonra qırıcı təyyarələri uçuşa qadağan bölgələr olan Türkiyə Böyük Millət Məclisi baş qərargah binaları üzərindən alçaq uçuş keçiriblər.

Ankaradan əməkdaşımıza məlumat verən 2 jurnalist bunu "son dərəcə anormal durum" kimi xarakterizə ediblər. "1980-ci il hərbi çevrilişini xatırladan bir durum var"-adını açıqlanmasını istəməyən jurnalistlərdən biri deyib.
CNN Türk kanalının canlı yayınına telefonla bağlanan baş nazir Binali Yıldırım da bu durumun bir "dövlət çevrilişinə təşəbbüs" olduğunu deyib :"Bir çevriliş təşəbbüsü kimi qiymətləndiririk. Əmr-komandanlıq zənciri olmadan ordu içindəki bəzi adamların qanunsuz hərəkətlərindən söhbət gedir. Millətimiz bilsin ki, demokratiyaya zərər gətirəcək heç bir fəaliyyətə icazə verilməyəcək. Vətəndaşların seçdiyi hökumət iş başındadır. Bunun iş başından getməsi ancaq millətin iradəsiylə olur. Bu çevrilişə təşəbbüs edib bu çılğınlığı yapanlar ən ağır şəkildə cəzalarını çəkəcəklər. Millətimiz sakit olsun"- deyə sözlərinə davam edən baş nazir Binali Yıldırım polis qüvvələrinin lazımi tədbirləri görmək üçün səfərbər edildiklərini vurğulayıb.

Ankarada cərəyan edən hadisələrə paralel olaraq İstanbul Boğazındakı iki körpü də keçidlərə qapadılıb. İstanbul aeroportunun da uçuşlara qapadılmasından sonra aeroportun ətrafına tanklar yerləşdirilib. Eyni zamanda Taksim meydanına və İstanbulun bəzi mühüm nöqtələrinə tankların yerləşdirildiyi bildirilir.
TRT kanalının ordu tərəfindən ələ keçirilərək "Yurdda Sülh Şurası"nın ordunun hakimiyyətə əl qoymasıyla bağlı bəyanatı oxunub. İstanbul Baş Polis İdarəsinin yerləşdiyi Vətən prospekti tərəfindən atışma səsləri gəlməkdədir. Gece yarısı Muğla vilayətinin Marmaris qəsəbəsindən açıqlama verən prezident Ərdoğan isə çevriliş təşəbbüsünə etiraz etmək üçün xalqı küçələrə, meydanlara, aeroportlara çıxmağa çağırıb. Təşəbbüsün arxasında Gülən icmasının olduğuna eyham vuran prezident Ərdoğan "Bunun da öhdəsindən gələcəyik. Millətimizi rahat olsun. Baş nazirimiz də lazımi açıqlamanı verdi. Polislər də daxil olmaqla bu işə qarışan hər kəs ən ağır şəkildə cəzalandırılacaq"- deyə vurğulayıb.
Ankaradan məlumat verən istefada olan bir hərbçi deyib ki, çevriliş təşəbbüsü ordu içindəki çoxu polkovniklərdən ibarət olan bir qrup tərəfindən təşkil edilib. "Xuntanın içində bir neçə general-mayor da var, onların bu işi axıra qədər aparmaları mümkün deyil. Səhərə qədər qalmaz ki, bu çevriliş təşəbbüsü basdırılar". TRT kanalında ordunun ölkə üsuli-idarəsinə əl qoymasına dair bəyanatın oxunmasından sonra ölkədə küçəyə çıxmaq qadağan edilib. Hərbi xuntanın İstanbul baş polis idarəsinin binasını ələ keçirmək təşəbbüsünün qabağını almaq üçün idarənin yerləşdiyi Vətən prospekti də qapadılıb. Çevriliş təşəbbüsündən sonra ilk açıqlamasını verən ana müxalifətdəki CHP lideri Kamal Kılıçdaroğlu "Demokratiyamıza sahib çıxırıq"- deyib.
Prezident Ərdoğanın müraciətindən sonra AKP vilayət, rayon və qəsəbə təşkilatlarının idarəçiləri məhəllələrdə mikrofonlarla xalqa müraciət edərək onları küçə və meydanlara dəvət edirlər.

02:09

Türkiyədə hərbi çevriliş cəhdinin arxasında "nurçular" hərəkatının banisi və lideri Fətulla Gülən durur.

Bunu Türkiyə Silahlı Qüvvələrindəki mənbələr bildiriblər.

Milli.Az DHA-ya istinadən bildirir ki, hazırda ABŞ-ın Pensilvaniya ştatında siyasi mühacir kimi yaşayan F.Gülənin tərəfdarları Türkiyə ordusunda orta rütbəli zabitlərdir.



Türkiyə ordusunun ali rütbəli zabitləri və komandanlığı qiyamçıları zərərsizləşdirməyə çalışır.

02:03

Türkiyədə hərbi çevriliş cəhdi ilə əlaqədar olaraq fövqəladə vəziyyət və komendant saatı elan olunub.

TRT telekanalında bununla bağlı açıqlama verilib.

Milli.Az DHA-ya istinadən bildirir ki, lakin az öncə Türkiyənin Müdafiə Nazirliyi bəyanat yayaraq bu açıqlamanın qanunsuz olduğunu vurğulayıb.

"Qiyamçılar TRT binasına soxularaq belə bəyanatı diktora oxutdurublar. Bəyanat mənasızdır. Ölkədə Konstitusiyanı və demokratiyanı qorumaq üçün bütün gərəkli addımlar atılacaq", - Müdafiə Nazirliyinin açıqlamasında deyilir.



01:56

Türkiyə prezidenti Rəcəb Tayyib Ərdoğan xalqı meydanlara, qiyamçılara qarşı çıxmağa çağırıb.

Milli.Az bildirir ki, Marmarisdəki "Grand Yazıcı Mares Otel"də olarkən CNN Türk-ün stadiyasına Skype vasitəsilə bağlanan Ərdoğan deyib: "Məlum strukturdan olan bir dəstə insan qiyama cəhd edib. Bunun da cavabı veriləcək. Bütün xalqı hava limanlarına, meydanlara, küçələər çağırıram. Millətimiz rahat olsun. Baş nazir də gərəkən açıqlama ilə çıxış edib. Bu işə, qiyama qarışan polislər də ən ağır şəkildə cəzalandırılacaq".

Türkiyənin dövlət başçısı daha sonra bildirib: "Hazırda ölkəmin prezidenti olaraq çox açıq və konkret deyirəm: qurucusu olduğum partiyanın bütün pənsubları, bununla yanaşı milli iradəni təşkil edən vətəndaşları şəhərlərimizin meydanlarına dəvət edirəm. Şəhərlərimizin meydanlarında xalqımızla əl-ələ olacağıq və bu qiyama başlayanlara gərəkən dərsi orada verəcəyik.



Bu gün baş verənlər gerçəkdən də Silahlı Qüvvələrin daxilindəki bir azlığın qiyam cəhdidir. Bu məlum yapıya aid, paralel təşkilatlanmanın təşviq etdiyi, onların istifadə etdiyi hərəkətdir. Ölkəmizin birliyinə, öərabərliyinə, bütünlüyünə qarşı olan bu hərəkətə millət olaraq gözəl cavab verəcəyimizə, bu adamların gərəkli cəza alacaqlarına inanıram. Türkiyə belə qiyamlarla ucuz satılacaq ölkə deyil, Pensilvaniyadan da idarə olunacaq ölkə heç deyil. Millətimə səslənirəm, millətimizi meydanlara, hava limanlarına dəvət edirəm. Millətcə meydanlarda, hava limanlarında toplanaq və bunların o azlıqdakı qrupu tankları, topları ilə gəlsinlər, xalqa nə edəcəklərsə, orada etsinlər. Xalqın gücünün üstündə bir güc tanımadım indiyədək. Bu qiyam cəhdinin uğurlu olacağına inanmıram. Tarix boyu qiyamçıların heç biri uğurlu olmayıb. Əfsuslar olsun ki, orduda komandanlıq zənciri pozulub. Amma bu ölkənin Silahlı Qüvvələrinin Baş Komandanı mənəm və mənim xəbərim olmadan belə addım atanlarla bağlı prokurorluq da müvafiq addımları atıb".

01:40

Ankarada Türkiyə Milli İstihbarat Təşkilatının (MİT) binası yanır.

Milli.Az AHT-yə istinadən bildirir ki, binanın ətrayfında xeyli sayda yanğınsöndürən maşınlar və hərbçilər var.



01:24

Türkiyə prezidenti Rəcəb Tayyib Ərdoğan İstanbuldakı Atatürk hava limanına yollanıb.

Milli.Az AHT-yə istinadən bildirir ki, bunu eşidən istanbullular limana tərəf axışırlar.



01:17

İstanbulun Baş Prokurorluğu hərbi çevrilişə cəhd göstərmiş hərbçilərlə bağlı həbs qərarı verib.

MilliAz AHT-yə istinadən bildirir ki, operativ-əməliyyat tədbirləri artıq başlanıb.



01:13

Bu gecə Ankarada Polis Akademiyasının binası partladılıb.

Milli.Az Hürriyet-ə tstinadən bildirir ki, İstanbulda Atatürk beynəlxalq hava limanı, Ankarada TRT-nin və itqtidarda olan Ədalət və İnkişaf Partiyasının baş qərargahının binalarının ətrafında hərbçilərdir.



Onların qiyamçı hərbçilər olduqları deyilir.

Lakin az öncə bəlli olub ki, qiyamçıların özləri mühasirəyə alınıblar.

00:58

Milli.Az Anadolu Xəbər Agentliyinə istinadən bildirir ki, Türkiyə Silahlı Qüvvələrinin Baş Qərargahında ordu generalı, Baş Qərargah rəisi Hulusi Akar qiyamçı hərbçilər tərəfindən girov götürülüb.

Baş Qərargahın binasında atəş səsləri gəlir. Bir vertolyot binanın ətrafına atəş açıb.



00:55

Sosial şəbəkələrdə Türkiyə vətəndaşlarının yazdıqlarına görə, hazırda Ankara və İstanbulun müxtəlif yerlərində atışma səsləri eşidilir.

00:47

Milli.Az bildirir ki, Anadolu Xəbər Agentliyinin yaydığı məlumata görə, "Türkiyə Silahlı Qüvvələrinin Baş Qərargahında bir qrup hərbçi hərbi çevrilişə cəhd göstərib, cəhdin qarşısı alınıb".

Baş Qərargah bu açıqlamanı "yanlış və uydurma" adlandırıb.





00:44

Milli.Az Habertürk-ə istinadən bildirir ki, Türkiyə Silahlı Qüvvələrinin Baş Qərargahı xüsusi bəyanat yayaraq "ölkənin idarəetmə strukturlarına nəzarəti əlinə keçirdiyini, ölkə rəhbərliyinine nəzarət altına alındığını, Türkiyənin beynəlxalq siyasətinin dəyişməyəcəyini" bildirib.

00:38

Türkiyənin baş naziri Binali Yıldırım ölkədə hərbi çevriliş cəhdinin qarşısının alındığını bildirib.

Milli.Az DHA-ya istinadən bildirir ki, baş nazir CNN Türk telekanalına söyləyib: "Bir qrup hərbçi onlara verilmiş səlahiyyətlər və silahlardan istifadə edərək məsuliyyətsiz, qanunsuz addımlar atmağa çalışıblar. Asayişi və qayda-qanununu qorumaq üçün əlimizdən gələni edəcəyik. Günahkarları ən ağır cəza gözləyir".

Ankarada naməlum hərbti vertolyot Milli İstihbarat Təşkilatının binasını atəşə tutub.
Hazırda Ankara səmasında hərbi təyyarələr və vertolyotlar uçuşur.

İstanbulda polis Bosfor boğazı üzərindən körpülər üzərində hər iki istiqamətə hərəkəti dayandırıb.

İstanbuldakı Atatürk hava limanı qapadılıb. Ankarada polis və jandarmeriyanın bütün əməkdaşları təcili işə çağırılıblar.

Ankarada hazırda TRT və MİT binalarını əsgərlər mühafizəyə alıblar. TRT yayımı dayandırıb.

Az öncə Türkiyə Silahlı Qüvvələrinin Baş Qərargahı "Ölkədəki situasiyaya tam nəzarət olunur, bütün dövlət qurumları kontrol altındadır" bəyanatını yayıb.