Türkiyə Prezidenti Rəcəb Tayyib Ərdoğan 4-cü Antalya Diplomatiya Forumunda çıxış edib.

Gundemxeber.az xəbər verir ki, "Baku TV" dövlət başçısının çıxışı ilə bağlı süjet hazırlayıb. Süjetdə Ərdoğanın nitqində səsləndirdiyi ən mühüm məqamlara yer verilib.

Türkiyə prezidenti çıxışı zamanı beynəlxalq cəmiyyətin qarşı-qarşıya qaldığı əsas problemlərə toxunub:

"Terror, aclıq, yoxsulluq, irqçilik, İslam düşmənçiliyi, iqlim böhranı kimi problemlərlə mübarizədə beynəlxalq cəmiyyətin çarəsiz qaldığını görürük. "Dünya 5-dən böyükdür", çünki insanlıq 5-dən böyükdür. Türkiyə bu mesajı dünyaya ən rahat şəkildə çatdıra biləcək ölkələrdən biridir. Biz rahat bir coğrafiyada yerləşmirik, əksinə, böhranların yaşandığı bir bölgədəyik. Bu, tarix boyu belə olub. Bu gün də bir çox problem və müharibələr məhz bizim yaxın ətrafımızda baş verir. Biz bu coğrafiyanın yalnız sakinləri deyil, eyni zamanda sahibləriyik. Min ildir ki, buradayıq və daha əsrlər boyu burada olacağıq.

Artıq toqquşmaların deyil, sülhün, qan və göz yaşının deyil, rifahın hökm sürdüyü bir coğrafiyada yaşamaq, övladlarımıza belə bir dünya miras qoymaq istəyirik".

Ərdoğan qonşu ölkələrlə münasibətlərə də toxunaraq bildirib:ə

"Qonşularımızla yaxşı münasibətlər quraraq, qarşıdurma yaşayan tərəflər arasında dialoqu təşviq edərək ölkəmizin ətrafında sülh mühiti yaratmaq istəyirik. Bizim heç kimin torpağında və ya resurslarında gözümüz yoxdur. Biz insanlara və bütün canlılara dəyər veririk. Bütün region xalqları üçün sülh, rifah və təhlükəsizlik arzulayırıq. Tramp və Putinlə daim dialoq və anlaşma içindəyik. Lazım olan bütün addımları atmaqda qətiyyətliyik. Biz Avropa ölkəsi olduğumuz qədər, Asiya və Afrika ölkəsiyik".

Dövlət başçısı, həmçinin Türkiyənin Avropa İttifaqına (Aİ) üzvlüyünə xüsusi diqqət çəkərək vurğulayıb:

"Türkiyə tamhüquqlu üzv statusu qazanaraq, ən qısa zamanda Avropa İttifaqında öz yerini tutmalıdır. Aİ-dən bu istiqamətdə konkret addımlar gözləyirik" , - deyə Ərdoğan qeyd edib.

Gundemxeber.az