ABŞ Prezidenti Donald Tramp CNN və "The New York Times" nəşrini İrana endirilən zərbələrin əhəmiyyətini azaltmağa çalışmaqda ittiham edib.

 Ağ Ev rəhbəri bu barədə özünün "Truth Social" platformasında yazıb.

"Saxta xəbərlər yayan CNN və batmaqda olan "New York Times" bu zərbələri kiçiltməyə çalışırlar. Halbuki İranın nüvə obyektləri tamamilə məhv edilib!" - deyə o bildirib.

İyunun ortalarında İsrail İranın nüvə silahına yaxınlaşdığını əsas gətirərək hərbi əməliyyata başlayıb. İyunun 22-də ABŞ də münaqişəyə qoşularaq İsfahan, Fordo və Natanzdakı nüvə obyektlərini bombalayıb.

Tramp və Pentaqon rəhbəri Pit Heqset həmin obyektlərin tamamilə məhv edildiyini bəyan ediblər. Beynəlxalq Atom Enerjisi Agentliyinin rəhbəri Rafael Qrossi isə obyektlərə ciddi ziyan dəydiyini bildirib. Lakin CNN və NYT Pentaqonun kəşfiyyat hesabatına əsaslanaraq yazıblar ki, əsas komponentlər məhv edilməyib, proqram, sadəcə, bir neçə ay geriyə atılıb./oxu.az