Rusiyanın Çelyabinsk vilayətində FTX və İstintaq Komitəsinin əməkdaşları "Yujuralzoloto" Qapalı Səhmdar Cəmiyyətinin (YUQK) ofislərində axtarış aparıblar. Gundemxeber.az xarici mediaya istinadla xəbər verir ki, istintaq tədbirləri şirkətin rəhbəri və əsas səhmdarı, "Forbes" siyahısında 1.9 milyard dollar sərvətlə 78-ci yerdə olan milyarder Konstantin Strukovun da iş yerində aparılıb.

Axtarışlara səbəb YUQK-ya məxsus ərazilərdə ətraf mühitin qorunması, sənaye təhlükəsizliyi və obyektlərin istismarı qaydalarının pozulması ilə bağlı faktlardır. Hüquq-mühafizə orqanlarına görə, bu hallar su obyektlərinin çirklənməsinə və ekologiyanın pisləşməsinə səbəb olub. Son illərdə şirkətdə altı ölüm faktı da qeydə alınıb.

Şirkət əvvəlcə şərh verməkdən imtina etsə də, sonradan mətbuata açıqlamasında bildirib ki, qızıl hasilatı, həmçinin emalı davam edir və nəzarət orqanları ilə daimi dialoqdadırlar.

Qeyd edək ki, 2024-cü ilin avqustunda "Rostexnadzor"un tələbi ilə şirkətin dörd yatağında işlər dayandırılıb, pozuntular aradan qaldırıldıqdan sonra həmin məhdudiyyətlər noyabr və dekabr aylarında götürülüb. Eyni zamanda, 2024-cü ilin yazında "Svetlinski" yatağında texniki göldə baş verən bənd qəzası nəticəsində çay suyunda PDC-ni 192 dəfə aşan sianid aşkarlanıb, 330 min kv.m əkin sahəsi zəhərlənib və zərər üç milyard rubl dəyərində qiymətləndirilib. Bu səbəbdən şirkətə qarşı 15-dən çox inzibati iş açılıb.

Gundemxeber.az