Rusiyanın Müdafiə Nazirliyi bildirir ki, ötən gecə ölkə ərazisinə 91 ədəd Ukrayna istehsalı pilotsuz uçuş aparatı (PUA) ilə hücum olub.

Gundemxeber.az xəbər verir ki, rəsmi məlumata əsasən, bütün dronlar hava hücumundan müdafiə sistemləri tərəfindən zərərsizləşdirilib.

Rusiya teleqram kanallarında yayılan xəbərlərə görə, dron hücumlarından biri Moskva vilayətində yerləşən Krasnozavodsk şəhərindəki kimya zavoduna yönəlib. Həmin ərazidə ardıcıl partlayış səsləri eşidilib, yerli sakinlər azı 9 partlayışın baş verdiyini bildiriblər.

Bundan başqa, PUA-lar Belqorod, Kursk, Lipetsk, Bryansk, Voronej, Novqorod, Tver, Tambov, Leninqrad, Orlov, Vladimir vilayətləri ilə yanaşı, Krasnodar diyarı, Moskva regionu, Qara dəniz akvatoriyası və anneksiya olunmuş Krım ərazisini də hədəf alıb.

Hadisə nəticəsində zərər və itkilərlə bağlı hələlik rəsmi açıqlama verilməyib. Hücumların intensivliyi Ukraynanın Rusiyanın arxa cəbhəsinə zərbə imkanlarının artdığını göstərir.

Gundemxeber.az